Wednesday 6 April 2011

La Couleu d'Jèrri - The Jersey Flag

Jersey flag 1La couleu d'Jèrri étha 30 ans d'main. Ch'fut l'7 d'Avri 1981 qu'la nouvelle couleu auve l'êtchusson couronné d'vînt officielle.
The modern Jersey flag with its crest and crown celebrates its 30th birthday tomorrow as it's been official since 7th April 1981.

George d'La Forge avait ardgui avaû l's années pouor eune nouvelle couleu - mais i' n'tait pon tout à fait en faveu du rêsultat:
George d'La Forge had written in support of a new flag for many years - but the compromise flag we've ended up with isn't the one he most wanted:

La Couleu d'Jèrri
J'avons-t-i' assez d'vièrs Jèrriais dans l's Êtats aujourd'aniet pour proposer l'adoption d'eune couleu tch'est Jèrriaise, Nouormande, et en même temps Britannique, pour en rempliaichi ieune tchi r'présente pûtôt l'Irlande qué Jèrri? Jé n'crai pon qu'Sa Majesté la Reine èrfus'sait d'approuver l'changement. (...)

"En pâlant d'couleurs, i' m'veint à l'idée tchi'i' y'a longtemps qué j'sis à êprouver à pèrsuader tchique Membre d's Êtats dé proposer d'changi la couleu d'Jèrri à chein qu' ou dév'thait être: Les trais léopards dé Nouormandie. La cheinne tch'est au haut du siège du Bailli dans la Chambre d's Êtats est mangnifique. À m'n idée ch'est stupide dé continnuer à appeler la crouaix d'St. Patrice la couleu d'Jèrri quand ch'est en réalité la couleu Irlandaise. J'avons les trais léopards dé Nouormandie sus nouos sou, sus l'sceau d'nouot' bailliage, sus hardi d'nouos timbres et sus nouos dotchûments officiels. Pouortchi pon sus nouot' couleu?" (...)

En pâlant d'la Couleu d'Jèrri, j'sis ravi d'vaie qu'autchun membre né s'est pon 'couo d'menté d'am'ner l'affaithe dévant L's Etats. J'éthais pourtant aimé vaie les trais léopards au haut du mât d'vant mouothi! (...)

J'tais bein content d'vaie, dans la gâzette du 29 dé mai, qué L's Etats s'en vont, à la fîn, considéther l'adoption d'eune nouvelle couleu pour Jèrri.

Comme ou l'savez bein, y'a d's années qué j'mentionne lé sujet dans mes lettres. J'ai tréjous dit qué lé fait qu' j'avons les trais léopards sus l'sceau dé nouot baillage, sus nouos dotchûments officiels, sus nouos sou et nouos tîmbres est eune bouanne raîson pour les aver sus nouot' couleu étout, et j'sis bein content d'vaie tch'i'sont montrés dans l'portrait tch'est dans la gâzette. Mais j'sis d's'appointé d'vaie qu'la crouaix d'St Patrice est acouo sus la couleu et qué les léopards sont dans un p'tit êtchusson en d'ssus du mitan d'la crouaix à la pliaiche d'êt sus l'entchi d'la couleu. (...)

No comments: