Monday 2 February 2015

Viers temps

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

Viers temps
Hon! Je n'sis pon de cheux qui craient
Que tout va pour le mûs;
Mais, loin d'itai, je cré, ma fé,
Que, tout buonn'ment, ni pûs
Ni mains, tout va, talarigo,
Aux mill' diantr's, et je d'vine, -
Si nou n'y met quiqu' frein, - Jerri
Ne s'ra bétôt que ruine.

Je m'rappell' du buon vier quériot
De feue Manon Moignard;
Je m'souveins du cutter c'mandé
Par feu captain' Perchard:
Et m'dirous q'nou z'est pûs heureux,
Madé, aniet q'nou z'a
Batiaux ov reux, carross's sans ch'vaux,
Et autr's bêtis's coumm' chla?

Pourqui et gambe et pid avons-je
Si ché n'est pour marchi? -
Et 'bosse et c'min d'fé, - j'vo's l'démande, -
A qu'êch' peuv'nt-i servi,
Sinon à fair' des Angliais v'né
Ichin happer nos sous,
Induir' le monde à gavachi,
Et faignans fair' de tous?

Et ches Steamers! ah, la minsère
D'en avé jamais veu
Appréchi d'nous, et ov lus reux,
Lus fichu brit et feu,
D'not' côte écachi les paissons
Qui d'si buonn' soup' faisaient,
Et fricots à si buon marchi
Si souvent no's dounnaient.

Et pis y-a ti' pas ches grands creux,
Qui n'sont que creux à rats,
Iou s's'ont enfoncés les Etats:-
Quant à mé, je n'crains pas
De dir' que j's'rons par ieux, quiq' jour
Ou niet, tous engloutis,
Si y-a un trembliément de terre
Devant qui n'saient remplis.

Et chu College et touos ses maîtres
Et lus fichu latin,
Dans nos jeun's jours entendait-on
pâler de tai gnolin?
Nou z'apprenait à lière un p'tit,
A écrire et chiffrer;
Hon! nos buonn's gens, mais viyions donc, -
Qu'êch' pûs dait-on d'mander.

Et chu Le Feuvre à qui j'en veux
Quasi coumme à Pickrinne;
Pourqui êtr' v'nu gâté nos p'its
Et voulé fair' la mine,
L'affronté! qu'l'iau que nos anchêtres
Bévaient n'était qu'puté,
Et q'not' santé veut que j'prennions
Chell' qui veut n'os puré

Et y-a ses câbl's mins dans les rues
Et au mitan d'la mer;
Pour fair' des gens des buts du monde
En clin-d'yi s'entr'pâler;
Y-a chorchell'rie là d'dans! - Quand même,-
En avions-j' donc que faire?
Missis Godfray, post' dans panier,
Temps fut savait tous pliaire!

Enfin les habits mins acht'heure,
Si chla ne m'affole pas!
Ben-gowns sont orts, et les buonn's brais
De corderoy min's bas.
Les veill's et ches chiers viers crâssets
Par Bals et Gas cachis -
Tout est si changi que, marjoingue -
Je n'sais pus iou j'en sis.

Et savé qu'ya des niais qui sont
Assez apperts pour dire
Que j'sis aveugle et radoteuse
Et les fais grand'ment rire!
Riés - riés! mais, - d'lautr' côté d'la buoche
Che s'ra, - quand... mes buonn's gens!
A votr' tou' v'nus à m'n âge ou f'rez
VOT' DEU' DES BUONS VIERS TEMPS.

No comments: