Monday 18 May 2015

La Samaritaine

Né v'chîn l'texte d'aniet d'not' auteu du mais, Livonia:

Here's today's text by our author of the month, Livonia:

La Samaritaine
Et bein bouanne gens t'channais je m'en vais vos paslé
De la miyieu petite hardelle de tout l'vaiziné
N'ou za biaoux, ergardé eprouvé à cherchi
N'ou n'en trouve pas bein épais ditelle comme yi
Mais je ne m'en vais as vos la nommé
Seulement la p'tite Samaritaine du vaiziné.

N'importe dans tchi temps qu'ou yialais
Que sait l'matin ou bein le sé, ou l'arlevais
Ou'l est trejous contente et bein aise de vos vais
Et ch'est tout d'eun coup eune bouochie et une tasse de Thée
N'ou peut l'applé et s'en se trompé
La bouanne Samaritaine du vaiziné.

Mais quand ou zêtes par bonheur invitais
Ou vos donna d'aoutre choses que des beurrais
Ches yi qui fait toute sorte de pâtishie
Seulement a l'argardé ou vos fait envie
Mais avec notre hardelle y ne faout pas seulement la r'gardé
Y faout bein vite mangi pour pouvé l'admithé.

Mais comme la preuve du podin est quand n'ou l'mange
Avec notre ardelle y faout mangi et n'ou mange
Ou fait des "Tarts" de g'lais, de pommes et d'cremme
Mais pour les derniers; ches là les siens qu'oul aime
De chest la; ou vos en donne que par le saint p'tit
Quand ou peut ou les garde tout près, tout près: d'yi.

Mais écoutez: je crains qu'ou n'a eun p'tit secret
Car quand n'ou l'y d'mande comment qu'ou les fait
Ou vou r'garde et avec eun bein "nice" souori
Nia pas d'soin, nia pas d'soin comme ou dit
Ils ont tait faite et ches pour les mangi
Et s'ou pâslais trop je m'en vais m'mâri.

Et comme n'ou n'veur pas la vais en guédon
Nou s'tait et nou mange de cha qui yia d'bon
Mais je grand r'gret de l'dithe ou s'en va nos tchité
Je f'thons eune grande perte dans notre p'tit vaiziné
Mais n'ou n'pouora jamais, nen jamais oublié
La bouanne p'tite Samaritaine du Vaiziné.

Au revoir, Louise! Au revoir.

No comments: