Wednesday 15 July 2015

1911: A Fragment in the Patois

Né v'chîn la preunmié articl'ye dé Piteur Pain (dans l'Morning News du 24/8/1911):

Here is the Pain family's first appearance (in the columns of the Morning News of 24/8/1911):

A Fragment in the Patois
Regardless of expense, we have secured the services of one of Jersey's most snappy patois writers. He promises us a series of humorous comments on current local political, social, and fireside events, whilst his womenfolk will occasionally contribute their views on different topics, social functions, mixed bathing, and the harem skirt. This patois column will mainly interest our good country clients, and, we trust, will become not the least interesting corner of a bright and thoroughly live newspaper.

Y'a bieau ji qué j'tais ennyé d'forgi, et Laïzé prétendait qu'jamais not' fille n'trouv'thai a s'mathié dans l'vaîsiné d'la Mare Angot. A dithe vrai, j'tais dé s'n'avis; l'caractethe d'ma fille est pus-ou-mains pointu; oul est longue et pliatte dé partout; ou teurt ses hanques en marchant, et malgré les sous que j'dèspense en bliancs cotillons et dentelle - pas un seul ouédre nè la siet a la sortie d'la Chapelle.

Et pis, après tout, j'sis ennyé d'forgi et dé d'meuthé èsternell'ment a la campanne; ch'tait dévnu trop assoumant pour un houmme dé m'n'èsducation. Car, touos vos l'dithont, mes pathents n'èspeignîtes rin pour m'instruithe; j'sait l'Angliais, l'Francais d'France (mus qu'abon des membres dé not' police) et j'peux adérchi l'paids d'eunne barre dé fé a eunne demié-livre près.

J'sis ennyé d'féthé les quédolles des Trintais, et ennyé étou dé tréjous les oué s'pyindre qué lus tchéthues n'faisaient pon bin. J'ai tchiq sous pliéchis dans les fonds Chinouais, et la maintchi d'un cutter qui fait la fraude entre ichin et l'Portunga - sans conté l'bin d'l'onclye a Laïzé si n'sé mathie pon a yunne de ches hérpies qui sont tréjous a y'envié de fricots d'pais-d'mai, ou d'concombres, ou d'lait èsputhé. Ch'est tant tchi, quand j'oui qu'l'Editeu du "Morning News" r'gardait a-touôre dé lî pour un houmme d'éducation pour èscrithe sus sa gazette, j'm'en fut l'aut' sé bravment l'trouvé. Y' vit ben tout d'un co qué j'tais l'moussieu tchi lis fallait - et jé n'fûmes pas long a faithe marchi. Deux chents louis par an, louogi au d'sus d'l'office, la foualle, la veue, un banc a l'Eglyse, des titchets d'concert pour toute la famille et eunee carosse dé temps en temps pour allé erchévé les viers comptes dé forge dans ma vielle pâraisse. J'n'avons pon oquo décidé a tchi boutiques qu'j'ithons pour not' viande, not' paîson, nos bottes, et un dmié chen d'blianches quéminses pour mé; mais coumme jé comprends qu'l'èscrivains d'gazettes ont tréjous vingt du chent d'rabat, n'y'étha pon d'embaras. Sitot qué jé s'sons settlées, j'envièthons not' carte est boutiques et chose seuthe qui s'droqu'thont d'presse a monté nos d'grès.

Jé s'a mé qu'èscriv'thait l'pus souvent mais d'temps n temps Laïzé ditha ch'qu'ou pense des villaises, et y s'pouôrait bin qu'ma fille contribûtha eunne verge ou deux d'vérsets par chin par là - ou'l a un don d'chu bord là.

Piteur Pain
24/8/1911

No comments: