Thursday 1 October 2015

Notre Vier Lingo

L'auteu du mais: châque mais en 2015 j'allons bliodgi des textes d'un auteu Jèrriais. Not' auteu du mais d'Octobre est Augustus Asplet Le Gros (1840 - 1877).

Author of the month: each month in 2015, we'll be blogging texts by a Jèrriais author. Our author for the month of October is Augustus Asplet Le Gros (1840 - 1877).

Notre Vier Lingo
Vrais Jêrriais nès, et Normands d'race,
Oublliérait-nou la langue d'Wace,
Le vier lingo, tuos les buons d'vis,
Que nou-s-aimait au temps jadis.

Au coin de s'n-âtre et d'sa cônière,
Nou n'cherche pon dutout à nière;
Et qu'est qu'i puorrait enhanner
D'nos ouir chanter et badiner.

Si nou peut séquir une lerme,
A quique peine mettre un terme,
J'ter des suôrits par chin par là,
Par ses chansons - y-a-t-i grand ma?

La ruogeur quique feis m'en monte,
Quand j'vei des Jerriais aveir honte
De leux jergon, et d'leux pays;
Quand j'vei d'itè, j'en sis payi.

Jêrry! Jêrry! bénin coin d'terre,
Dans men biau p'tit vallon d'St.-Pierre,
Ten vier lingo je chanterai,
Tant que j'puorrai, tant que j'vivrai.

No comments: