Tuesday 17 November 2015

1914: Piteur en voyage à Hull

100 ton steam crane, Alexandra Dock - geograph.org.uk - 486419Tch'est qu'i' 'tait l'prix des Rouoyales à Hull en Angliétèrre en 1914? Not' bouôn vièr Piteur Pain, trouv'thait-i' la rêponse?

What was the price of Jersey Royals in Hull, England, in 1914? Would our good old Piteur Pain find the answer?


Piteur en voyage à Hull
Coumme ou savez, l'Chef m'avait dit d'embértchi sus un baté a patates pour allé jusqu'a Hull vaie tchi prix qui s'vendaient par là.

J'ai 'té à Hull, all right! et me v'la dé r'tou - mais pour ch'qu'est du prix que s'vendent nos Royales par là, faudra s'i-en-cas qui m'y renvie; du djantre si j'en sais la moindre chose. Je n'fumes que huit heuthes a terre, et j'trouvi bin aut' chose a faithe que d'cherchi lus Marchi. La preumié chose a faithe en dèsbertchant, ch'fut de dèsjeunné; et pis, chutte djob la finie, de s'otchupé d'ou-ès qu'nou pouorait diné dans les prix doux. Entre temps, y'avait des tremouais dans tchi qui fallait monté pour allé vaie ch'qui y'avait difféthantes sortes de biéthe sus tchi j'voulais poué dounné eunne opinion - j'fit deux fais l'tou d'la ville d'vant que d'poué m'décidé; et j'fini par en rapporté très joudjies pour continué sus l'viage.

Mais tchi ville prêssie! Ch'est halle, et quapuche, et quétille, tout l'temps partout!

J'n'avaimes pas oquo fini d'amathé l'Steam au tchai que deja y'avait eunne chentaine de ouedres sus l'pont, a crochté les bathis. Eunne enorme djindas les èsrachit, craque, creve, ou boste, eunne vingtaine a la faie; tandi que d'l'aut' bord du Steam y'avait dux grands batieaux pliens d'tcherbon, et un autre demié chent d'hoummes a dèschergi un tounné a la fais. Tchi sabat!

J'en eut betot assez de toute chutte calfettie la, et j'm'en fut a terre souos la condite d'un ouvriyi qui m'dit que ch'tait l'Bouan Djeu qui m'avait envié a san s'cour. Sa femme avait onze aviers en bas âge, sa vielle méthe s'etait drotchie avaux les dgrès, et persounne n'avait mangi d'pis avant hier. J'lis ballyi quat' sous, et j'promins d'pâslé d'sen triste cas a Laizé quand je r'sethais siez nous.

Après dèsjeuné et en attendant dîné, j'trouvi l'temps pour accaté un p'tit souv'nir pour nos gens; ch'est eunne chose qui s'dét, et j'n'y manque jommais. Eunne belle djêne avec des flieurs brodées, pour Lonore, et eunne Post Card pour Laizé avec le protrait d'un chimtchethe ov le tombé d'eunne femme qu'avait néglyigi s'n'houmme pour se concasré a la conversion des pécheurs.

Quand je r'gagnyi l'baté, d'viers siex heuthes, ne v'la ti pas qu'ma casaque, qu'j'avais laissi pendue a un cro, dans ma chambre, n'y'etait pus. Je c'menchi un sabat! Eunne casaque qui m'avait couoté trente shellings y'a djix ou douze ans, sans conté les frais d'l'avé r'touonée deux fais et teinte, et r'doubliée! J'nos en fumes, l'Steward et mé, a l'Office de la Compognie; et j'lus dit ch'que j'en pensais, et tchès qu'dithaient les Jerriais quand ils apprendraient qu'nou n'a pon sen fait en seuthté dans lus batieaux. A mains, que j'ajouoti, qu'ou ne r'trouviez ma bouonne casaque, je r'cliâme très louis! J'en taimes oquo a d'battre les conditions quand nos v'la un boustre de clerque qui r'sourd avec ma casaque qui v'nait d'être rapportée par tchiqu'un. J'en eut un dèspié! Mé qui m'n'allais avé au mains deux louis d'compensation, je n'r'eut qu'ma casaque qui, entre nous, vaut chinq shlings tout au pus. Ch'n'est pas d'chance!

Y'eut un moniéthe de 'fall out' entre mé et l'Captaine en r'venant. J'avais monté sus l'Bridge tandi que l'Captaine 'tait a faithe un soumme, et j'avais dounné eunne pouognie de p'tun au matlot qu'etait a gouverné pour me laissi t'nin la barre un mio j'ai un bieaufréthe qu'est cook a bord d'un cutter, que j'lis dit. J'n'eut que l'temps d'dounné deus-très tours a la reue, et d'hallé sus yun ou deux des manivelles de l'engin, que ne v'la des clioches qui s'mettent a sounné, et des suffliets a sufflié, et toute la djingue qui r'sourt de d'dans l'Châté. L'Captaine me prins par la pé du co et m'fliantchi a vaux l'compagnon, l'contremaitre m'enfrummi dans ma cabinne, et i' s'mintes tous a couore d'un bord et d'l'autre sus l'pont.

Mais pour vos dithe tchès qu'est l'prix des Royales à Hull - v'la tchi m'èscappi tout a fait d'la mémouéthe. Faudra si-en-cas m'y renvié quand mes jougues s'ont vieddes. Le Chef prétend r'tenin les frais du viage sus mes gages. Ch'est ch'que j'verrons!

Piteur Pain
La Chronique de Jersey 20/6/1914

No comments: