Sunday 6 December 2015

L'idèe!

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

L'idèe!
Blianc coumme unn' chitchette, maîgre coumme squélette,
Allouôgni dans san lièt, pus d'à maintchi paré,
Lé bouanhoumme, bein seûre, s'en allait à gros pas ;
Faillyi coumme i l'tait, tout coumme, i l'èscoutait
Sa femme qu'allait et venait dans la tchuisinne à bas.
Bétôt pourtant lé vi, ov unn' pouôre main, cârri
Un p'tit but dé blainket et d'lincheu,
Car i l'avait senti unn' raide bonne odeu'
Monter jusqu'à sa chambre, et l'y ravigotter l'tchoeu!
Et tchiq' pétit d'temps oprès, quand la bouann' femme vint l'vais,
I l'y dît tout douôch'ment, et d'unn' toute faillyie vouaie:
"Sais-tu bein qué jé'm'trouve un p'tit mus, ma chière,
Et j'érais envie d'mangi un mio, dé fricot,
Qué tu veins justément dé serrer dans l'armouaire - "
La bouann' femme resti coumme si l'avait paffèe,
Et ov la colère dans l's yiers, l'y dît brusquément :
- "Sécours dé la vie, en v'là unn' idèe !
Vraîment, jé n'en r'veins pon, eh, quémment, quémment,
Cré tu qué, pour té faire plaîsi.
J'm'en vais entammer et trébutchi
Un jambon qu'ov bein d'la peine j'ai tchui
Tout exprès pour le jour dé te'n'enterrement?" -

No comments: