Having commented on the end of the Great War, the Owl continues in a completely different vein:
(siette et fîn)
Ou s'sez tous bain surprins d'apprendre que la fin d'la dgerre a affecté le Caouain bain sérieusement.
Mais ch'est d'même pourtant!
Laisez-mé vos raconter chenna.
L'aut'e matin j'étais bain embarrassé à traduithe un articlye de d'sus un papi Angliais, pour mettre dans not'e gâzette, quand Frainque Amin vint m'dithe comme chenna, "Caouain, les Directeurs voudraient t'vaie pour tchiques minutes dans la Board Room."
Je vis bain par sa mîne qu'y avait tchiquechose d'extraordinaithe en allant, alors je li d'mandi, "De tch'est qu'i' s'agit don, Frainque? Est-che tchiquechose de sérieux?"
Mais l'pendeloque ne m'raîponni pas, i' n'fit que d'hauchi l's êpaules comme pour dithe "je n'ai pas d'renseignements à t'donner!"
Ou pouvez bain penser qu'i' m'en passi de bain des sortes dans la tête sus le c'min. Ch'tait la prumié feis que nou me d'mandait d'pathaître dévant l'audguste présence de ches gros messieux-lâ, et je n'pouvais pas m'imaginer tch'est qu'i' pouvaient m'vouler.
S'en allaient-i' me hauchi mes salaithes? Je l'méthitais sé-m'n âge bain, mais nous aithait cru qu'ils aithaient fait chenna longtemps d'vant, ch'est-à-dithe duthant la dgerre, mais acheteu ch'tait justement ch'la, i' s'en allaient p't-être êprouver à me les r'molli.
Ah! mais sapresti! chute feis-là!
Je n'eus pas l'temps d'faithe d'autres réflexions, Frainque ouvri la porte et m'fit entrer d'vant li.
Ils 'taient tous assis attou d'une tablye avec des papiers devant ieux, chein qui m'fit penser ès portraits que j'avais veu de la conférence des Alliés à Versailles.
Je dis comme chenna "Bonjour Messieux."
Personne ne raîponni, sinon iun qui grommâchi tchiquechose dans sa barbe.
Opprès un silence d'une minute ou deux, manque d'aver aut'e chose à dithe, iun des membres me fit un signe et dit, "Take a seat."
Je m'assiévi.
Le président eut une mauvaise bordée à toûtre et pis i' m'adressi la pathole.
"Caouain" qu'i' m'dit, "i' s'ait tout-à-fait superflu de ma part de t'apprendre chein que, sans doute, tu sais déjâ, ch'est-à-dithe, que la dgerre est finie."
"Ah!" j'pensi à mé-même, "ch'est comme je craignais, v'là douze sous la s'maine de hallé de d'sus mes gages!"
Le président continuit: "Dans un temps comme chennechîn, et souos des circonstances aussi glorieuses, il incombe à tout vrai Chrêtien de pratichi un p'tit mio d'introspection et d'mettre comme nou dit, sa maison en ordre. Ch'est une occasion que nou dait célébrer par d'abord, pardonner, et pis en suite, oublier toute ancienne héthèque et toute vieille rantchunne que nou pouorrait aver contre tchi que che sait."
"Hear, hear!" s'fit iun des Directeurs. "A not'e dernié meeting, tan nom vint sus l'tapis, et plusieurs de nos messieux de pliaignirent de 'té et lus exprimithent bain fortement sus ta conduite et sus la manièthe persistente que tu continue à t'êdgéther dans l'mauvais c'min. Quant à tan travas officiel et les services que tu rends à la Direction comme journaliste, i' touchent presque à la perfection, et je dais dithe qu'i' sont hautement appréciés. (Hear, hear).
"Aha," j'pensi, "i'y a p't-être oquo du bon!"
"Mais," i' poursuivi, "les Directeurs ont creu qu'il est d'lus d'vé de s'otchuper de tes affaithes conjugales, qui, selon ieux, laissent hardi à d'sither, et, dans t'n intéthêt aussi bain comme pour maintenin l'honneu et la réputation des "Chroniques de Jersey" ils ont, à l'unanimité, passé une résolution condamnant ta conduite, et ils ont en même temps prépathé un espèce de contrat que tu t'en vas singer, séance tenante, conjointement avec un autre parti."
En finissant san discours i' fit un signe à Frainque Amin, qui pathu comprendre exactement chein qu'i' fallait faithe, car i' sorti d'l'appartement et dans une minute ou deux rentri, avec tchi qu'ou criyiz?
Jamais ou n'dévinethiez!
Eh bain, ch'tait Marie Hibou!
Ou pouvez craithe qu'i' y'eut une scène!
Ou n'pouvait pas me r'garder en fache lyi, mais ou s'mins à pieurnichoter, pour gâgni la sympathie des Directeurs, mais mé qui la connaît, je li dis carrément chein que j'pensais d'lyi.
Le Président m'arrêti et d'mandi à Frainque de liéthe le contrat.
Ch'tait une espèce de copie du service de mathiage, sinon qu'i' y en avait bain pus long.
Quand il eut fini, le Président d'mandi bain solonellement, "Caouain, est-tu disposé à signer chu dotchument-là?"
J'y t'nais d'sorte mé, alors pour allouogni l'temps, je dis comme chenna, "Place aux dames!"
Deux des Directeurs lus minrent à rithe, mais Marie Hibou n'se fit pas d'mander deux feis, ou prins la pliume des mains du Président et fit sa crouaix au bas d'la page.
Dévant que d'signer, de d'mandi au Président, "Y a-t-i' une clause qui dit que Marie Hibou obéitha au Caouain, sondit mari?"
"Oui, oui," i' m'dit, "tout chenna est inclu."
Je signi, et en m'touanant d'san bord je li dis "Sièt tan maître!"
Et je sortîmes de la Board Room et nos en fûmes à not'e mansarde. Je crains que che s'sa pas pour longtemps, mais j'vos dithai pus tard comment qu'tout va.
Caouain
Chroniques de Jersey 23/11/1918
No comments:
Post a Comment